قازقستان ریجنل ٹریڈنگ بلاک کو مضبوط بنانے اور رکن ممالک کے ساتھ باہمی تجارتی تعاون بڑھانے کیلئے تیار ہے: سفیر یرژن کسٹافین
ای سی او کے قیام کی 40 ویں اور ای سی او علاقائی بلاک کی توسیع کی 32 ویں سالگرہ کے حوالے سے ایف پی سی سی آئی میں تقریب
اسلام آباد (3 دسمبر 2025) صدر ای سی او ـ سی سی آئی و ایف پی سی سی آئی عاطف اکرام شیخ نے اسی سی او کو دنیا بھر کے ریجنل بلاکس میں انتہائی متحرک بلاک قرار دیتے ہوئے کہا ہے کہ تجارت، کاروبار اور باہمی تعلقات کے فروغ کیلے ای سی او پلیٹ فارم کی تشکیل ایک سنگ میل ہے۔
رکن ممالک کاروباری وفود کے تبادلوں اور فری ٹریڈ جیسے معاہدوں سے باہمی تجارت میں اضافہ کر سکتے ہیں۔
ای سی او کے رکن ممالک کو اکنامک کوریڈور کے ذریعے ایک دوسرے سے جوڑنے پر کام کرنا ہو گا۔ رکن ممالک ایک دوسرے کی بزنس کمیونٹی کیلئے ٹرانسپورٹ اور بینکنگ سمیت دیگر شعبوں میں سہولیات کی فراہمی پر کام کریں۔
وہ ای سی او کے قیام کی 40 ویں اور ای سی او علاقائی بلاک کی توسیع کی 32 ویں سالگرہ کے حوالے سے ایف پی سی سی آئی میں منعقدہ تقریب سے خطاب کر رہے تھے۔
عاطف اکرام شیخ نے مختلف ممالک کے سفارتکاروں کے ہمراہ اسلام آباد میں ای سی او ـ سی سی آئی پریزیڈنٹ سیکرٹیریٹ کا افتتاح کیا اور پرچم کشائی کی۔
تقریب میں ممبر ممالک کے سفارتکاروں، سینئر بزنس لیڈرز، ایف پی سی سی آئی اور ای سی او ـ سی سی آئی پریزیڈنٹ سیکرٹیریٹ کے اعلی حکام شریک ہوئے۔
تقریب میں نائب صدر فیڈریشن طارق جدون، سابق صدر ایف پی سی سی آئی ملک زبیر، چیئرمین کیپیٹل آفس کریم عزیز ملک اور چیئرمین کوآرڈینیشن ملک سہیل شریک ہوئے۔
تقریب سے پاکستان میں قازقستان کے سفیر یرژن کسٹافین نے خطاب کرتے ہوۓ کہا کہ قازقستان ریجنل ٹریڈنگ بلاک کو مضبوط بنانے اور باہمی تعاون کو بڑھانے کیلئے تیار ہے۔
انہوں نے مزید کہا کہ عاطف اکرام شیخ کی ای سی او رکن ممالک کو قریب لانے اور باہمی تجارت کو بڑھانے کی کوششوں کو سراہتے ہیں۔ پاکستان اور قازقستان کے باہمی تجارتی تعلقات تاریخ کے نئے باب میں داخل ہو رہے ہیں۔
تقریب سے ای سی او کے دیگر رکن ممالک کے نمائندوں اور دفتر خارجہ حکام نے بھی خطاب کیا۔
