اسلام آباد: (19 دسمبر ،2025)کیپیٹل ڈویلپمنٹ اتھارٹی (سی ڈی اے) نے رہائشی اور تجارتی جائیدادوں سے متعلق دستاویزات اور فائلوں کو ڈیجیٹل شکل دے دی ہے، اور اگر یہ منصوبہ مؤثر انداز میں نافذ ہو گیا تو جلد ہی تمام رہائشی اور تجارتی جائیدادوں کی تفصیلات ایک ہی کلک پر دستیاب ہوں گی۔
سی ڈی اے نے پنجاب لینڈ اینڈ ریونیو اتھارٹی (پی ایل آر اے) کے ذریعے لاکھوں صفحات اسکین کرنے کے بعد اپنا ڈیٹا بینک تیار کر لیا ہے اور اب جائیدادوں کی دستی منتقلی اور الاٹمنٹ کے نظام کے خاتمے پر غور کیا جا رہا ہے۔
ڈان کو دستیاب دستاویزات کے مطابق، 47 سیکٹرز اور ماڈل ٹاؤنز میں موجود 23,036 رہائشی جائیدادوں جبکہ 5,657 تمام تجارتی جائیدادوں کے ریکارڈ — جن میں ایگرو فارموں کے پہلے سے آخری ٹرانسفر تک کا مکمل ریکارڈ شامل ہے — کو ڈیجیٹلائز کر دیا گیا ہے۔
ریکارڈ رومز کے دورے کے دوران یہ بات سامنے آئی کہ وہاں موجود تمام فائلیں اسکین کی جا چکی ہیں۔ ایک سی ڈی اے اہلکار نے بتایا، “اب ہم سیکٹر ڈی-12 سے دستی منتقلی اور الاٹمنٹ کے خاتمے کا آغاز کرنے کا ارادہ رکھتے ہیں، جو ممکنہ طور پر آئندہ ہفتے سے شروع ہو جائے گا۔”
اتھارٹی نے شفافیت بڑھانے اور فراڈ کے خاتمے کے لیے لاکھوں صفحات اسکین کر کے ای فائلنگ متعارف کرادی، پائلٹ منصوبہ سیکٹر ڈی-12 سے شروع ہوگا
اہلکار نے مزید کہا کہ پائلٹ منصوبے کے طور پر سیکٹر ڈی-12 کو مکمل طور پر آن لائن کیا جائے گا، جس کے بعد دیگر سیکٹرز کو بھی مرحلہ وار شامل کیا جائے گا۔ “اب تمام زمین اور جائیدادوں کے ریکارڈ محفوظ ہو چکے ہیں۔ اس عمل کا مقصد عوام کو جائیداد کی منتقلی، وراثت اور لین دین میں سہولت فراہم کرنا ہے۔”
یہ امر قابلِ ذکر ہے کہ ماضی میں ناقص ریکارڈ مینجمنٹ یا بدنیتی کے باعث سی ڈی اے کے کئی اصل ریکارڈ غائب ہو گئے تھے، جس سے اصل خریدار شدید مشکلات کا شکار ہوئے۔
سی ڈی اے تین اقسام کی جائیدادوں سے نمٹتا ہے: تجارتی جائیدادیں اور دو اقسام کی رہائشی جائیدادیں۔ پہلی قسم میں وہ رہائشی پلاٹس شامل ہیں جو سی ڈی اے نے نیلامی یا قرعہ اندازی کے ذریعے فروخت کیے، جبکہ دوسری قسم، جسے “ایسٹ افیکٹیز” کہا جاتا ہے، میں وہ پلاٹس شامل ہیں جو ان افراد کو الاٹ کیے گئے جن کی زمین سی ڈی اے نے حاصل کی اور انہیں بطور معاوضہ پلاٹس دینے کا حق تھا۔
اسی زمرے میں بڑی تعداد میں جعلی الاٹمنٹ کے کیسز سامنے آئے۔
ذرائع کے مطابق، کئی معاملات میں ابتدائی الاٹمنٹ جعلی دستاویزات کی بنیاد پر کی گئی، اور پہلے الاٹی نے پلاٹس اوپن مارکیٹ میں فروخت کر دیے۔ بعد ازاں جب یہ بات سامنے آئی کہ الاٹمنٹ جعلی کاغذات پر مبنی تھی تو پہلے الاٹی اور ملوث سی ڈی اے اہلکاروں نے “اپنا جرم چھپانے کے لیے فائلوں کو سرکاری ریکارڈ سے غائب کر دیا”، جس کے نتیجے میں اصل خریدار مشکلات میں پھنس گئے۔
جبکہ کئی کیسز میں اصل فائلیں موجود تھیں، سی ڈی اے نے متعدد بار منتقلی کے بعد اچانک الاٹمنٹ کو جعلی قرار دے کر مزید ٹرانسفر روک دی، جس کا خمیازہ آخری خریداروں کو بھگتنا پڑا۔
سی ڈی اے حکام کے مطابق، اس قسم کے فراڈ کی بنیادی وجہ فائلوں اور ریکارڈ کا دستی نظام تھا۔
پی ایل آر اے کے اہلکار اعجاز احمد، جن کی ٹیم سی ڈی اے کے ریکارڈ کی ڈیجیٹلائزیشن کا کام کر رہی ہے، نے ڈان سے گفتگو کرتے ہوئے بتایا کہ رہائشی اور تجارتی جائیدادوں کے تمام دستیاب ریکارڈ اسکین کر کے ڈیش بورڈ پر فراہم کر دیے گئے ہیں۔
انہوں نے کہا کہ اس منصوبے کے تحت جائیدادوں کی منتقلی ای فائلنگ اور ڈیجیٹل نظام کے ذریعے کی جائے گی۔
“آٹومیشن ہمیشہ کرپشن اور ریکارڈ میں رد و بدل کے امکانات کو ختم کرنے میں مدد دیتی ہے۔ اب تمام دستیاب فائلیں اسکین ہو چکی ہیں اور کم از کم اب سے سی ڈی اے کے پاس مکمل ڈیٹا بینک موجود ہے،” انہوں نے کہا۔
اعجاز احمد نے مزید بتایا کہ نئے نظام کے تحت فائلوں کی نقل و حرکت آن لائن ٹریک کی جائے گی، ٹائم لائنز مقرر ہوں گی اور تمام سی ڈی اے افسران کو مکمل ریکارڈ تک رسائی حاصل ہوگی۔ “ایک کلک کے ذریعے وہ پہلی منتقلی سے آخری منتقلی تک مکمل ریکارڈ دیکھ سکیں گے،” انہوں نے کہا۔
انہوں نے زور دیا کہ “سی ڈی اے سے متعلق ہمارا منصوبہ تکمیل کی جانب بڑھ رہا ہے کیونکہ فائلوں کی تمام دستاویزات اسکین کرنے کا بڑا کام مکمل ہو چکا ہے۔”
جب سی ڈی اے کے چیئرمین محمد علی رندھاوا سے رابطہ کیا گیا تو انہوں نے کہا کہ اس منصوبے کا بنیادی مقصد شہریوں کو سہولت فراہم کرنا ہے۔
انہوں نے کہا، “وزیراعظم اور وزیر داخلہ نے ہمیں اس منصوبے کی ہدایت دی تھی۔ ہمارا ماننا ہے کہ آٹومیشن کرپشن کے امکانات کم کرنے کا بہترین حل ہے۔” انہوں نے مزید کہا کہ اس نظام میں ڈیجیٹل ٹریل موجود ہوگی اور ہر کارروائی لاگ ہوگی، جس میں یہ بھی شامل ہوگا کہ فائل کس نے منظور کی، کب کی، کیسے کی اور فائل کس افسر کے پاس رہی۔ “ڈیجیٹلائزیشن سے سروس ڈیلیوری میں بھی نمایاں بہتری آئے گی،” انہوں نے کہا۔
محمد علی رندھاوا نے مزید بتایا کہ اسلام آباد کیپیٹل ٹیریٹری (آئی سی ٹی) کے ریونیو ڈیپارٹمنٹ کے ریکارڈ، جو دیہی علاقوں کی زمینوں سے متعلق ہے، کو بھی پی ایل آر اے کے ذریعے ڈیجیٹلائز کیا جا رہا ہے، اور کئی ریونیو اسٹیٹس (مواضعات) کا ریکارڈ پہلے ہی ڈیجیٹل ہو چکا ہے۔
