نائب وزیراعظم و وزیر خارجہ اسحاق ڈار اور کویتی وزیر خارجہ شیخ جراح جابر الاحمد الصباح کی اسلام آباد میں ملاقات، علاقائی امن، دفاعی تعاون اور باہمی تعلقات پر تفصیلی تبادلۂ خیال
اسلام آباد (29جولائی2026) : نائب وزیراعظم و وزیر خارجہ اسحاق ڈار نے بدھ کے روز اسلام آباد میں کویت کے وزیر خارجہ شیخ جراح جابر الاحمد الصباح سے ملاقات کی، جس میں مشرقِ وسطیٰ کی موجودہ صورتحال، پاکستان اور کویت کے دوطرفہ تعلقات اور علاقائی و عالمی امور پر تفصیلی تبادلۂ خیال کیا گیا۔
دفتر خارجہ کے مطابق دونوں رہنماؤں کے درمیان خوشگوار ماحول میں ہونے والی ملاقات میں پاکستان اور کویت کے دیرینہ برادرانہ تعلقات کا جائزہ لیا گیا اور مختلف شعبوں میں تعاون کو مزید وسعت دینے کے عزم کا اعادہ کیا گیا۔
ملاقات کے دوران مشرقِ وسطیٰ میں جاری پیش رفت اور خطے میں امن و استحکام سے متعلق امور پر خصوصی توجہ دی گئی، جبکہ دونوں ممالک نے باہمی مشاورت اور سفارتی تعاون جاری رکھنے پر اتفاق کیا۔
کویتی وزیر خارجہ پاکستان کے سرکاری دورے پر منگل کو اسلام آباد پہنچے تھے، جہاں وزارت خارجہ کے اعلیٰ حکام نے ان کا استقبال کیا۔ دفتر خارجہ کے مطابق یہ دورہ دونوں ممالک کے درمیان تاریخی، دوستانہ اور باہمی اعتماد پر مبنی تعلقات کی عکاسی کرتا ہے۔
ذرائع کے مطابق پاکستان اور کویت توانائی، سرمایہ کاری اور دفاعی تعاون کو فروغ دینے کے لیے بھی مختلف تجاویز پر غور کر رہے ہیں، جن سے دونوں ممالک کے تعلقات کو مزید مضبوط بنانے میں مدد ملے گی۔
