کبل پولیس اسٹیشن کے قریب احتجاج کے دوران ہونے والے خودکش حملے میں مزید چار زخمی دم توڑ گئے، پولیس اہلکاروں سمیت 19 افراد شہید، تحقیقات جاری۔
سوات(3 اگست 2026):سوات کے علاقے کبل میں پولیس اسٹیشن کے قریب احتجاج کے دوران ہونے والے خودکش دھماکے میں شہید ہونے والوں کی تعداد بڑھ کر 19 ہو گئی ہے۔ پولیس کے مطابق زیرِ علاج مزید چار زخمی دم توڑ گئے، جس کے بعد ہلاکتوں کی مجموعی تعداد 19 تک پہنچ گئی۔
پولیس حکام کا کہنا ہے کہ حملہ آور نے اس وقت خود کو دھماکے سے اڑا لیا جب پولیس اہلکاروں نے اسے پولیس اسٹیشن کے داخلی راستے پر روک کر تلاشی لینے کی کوشش کی۔ دھماکے میں متعدد افراد زخمی بھی ہوئے جنہیں فوری طور پر مختلف اسپتالوں میں منتقل کیا گیا۔
ریسکیو 1122 کے مطابق واقعے کے فوراً بعد امدادی کارروائیاں شروع کر دی گئیں، جن میں 50 سے زائد اہلکاروں نے حصہ لیا۔ زخمیوں کو ابتدائی طبی امداد فراہم کرنے کے بعد مزید علاج کے لیے اسپتال منتقل کیا گیا، جبکہ واقعے کی تحقیقات جاری ہیں۔
ادھر خودکش حملے میں شہید ہونے والے دو پولیس اہلکاروں، کانسٹیبل مکرم خان اور کانسٹیبل حسین خان کی نمازِ جنازہ پولیس لائنز میں سرکاری اعزاز کے ساتھ ادا کی گئی، جہاں پولیس کے چاق و چوبند دستے نے شہداء کو گارڈ آف آنر پیش کیا۔
